నిఫ్టీ గత వారం కీలక స్థాయి 22,000 వద్ద ప్రారంభమై కరెక్షన్లో పడి 21,700 వరకు దిగజారినా రికవరీ సాధించి వారంలో 70 పాయింట్ల మేరకు లాభపడి చివరికి ఆ కీలక స్థాయి కన్నా పైనే ముగిసింది. సానుకూల సంకేతం కోసం వరుసగా రెండో వారంలో కూడా 22,000 వద్ద మరింత కన్నాలిడేషన్ సాధించడం అవసరం. అలాగే ఈ వారంలో మూడు ట్రేడింగ్ దినాలు మాత్రమే ఉన్నందు వల్ల మరింత కన్సాలిడేషన్కే అవకాశాలున్నాయి. నిఫ్టీ గత రెండు నెలల కాలంలో 22,000 వద్ద సైడ్వేస్లో కదలాడుతూ తీవ్ర ఆటుపోట్లు ఎదుర్కొంటోంది. గత వారం మిడ్క్యాప్ 100 సూచీ 600 పాయింట్లు, స్మాల్క్యాప్ 100 సూచీ 200 పాయింట్ల లాభంతో ముగిశాయి. అంతర్జాతీయ మార్కెట్ల తీరు ఆధారంగా ఇప్పుడు మార్కెట్ అప్రమత్త ధోరణిని కొనసాగించవచ్చు. అందువల్ల ప్రధాన మానసిక అవధి 22,000 వద్ద పరీక్ష ఎదురుకావచ్చు.
బుల్లిష్ స్థాయిలు: నిఫ్టీ రికవరీ బాట పట్టినా సానుకూలత కోసం నిరోధ స్థాయి 22,200 కన్నా పైన పటిష్ఠంగా క్లోజ్ కావాలి. స్వల్పకాలిక నిరోధం 22,550. కొద్ది రోజుల క్రితం ఏర్పడిన జీవితకాల గరిష్ఠ స్థాయి ఇది.
బేరిష్ స్థాయిలు: మరింత బలహీనపడినా రాబోయే కొద్ది రోజుల్లో ట్రెండ్లో సానుకూలత కోసం 22,000 వద్ద నిలదొక్కుకుని తీరాలి. విఫలమైతే ఇంకా బలహీనపడుతుంది. దిగువన మరో మద్దతు స్థాయి 21,700. ఇక్కడ కూడా విఫలమైతే మరింతగా దిగజారే ప్రమాదంలో పడుతుంది. ప్రధాన మద్దతు స్థాయి 21,500.
బ్యాంక్ నిఫ్టీ: గత వారంలో ఈ సూచీ 45,800 వద్ద రికవరీ సాధించి చివరికి 46,860 వద్ద ముగిసింది. కాని ఆల్టైమ్ గరిష్ఠ స్థాయి 48,600 కన్నా ఇంకా దిగువనే ఉంది. రికవరీ బాట పడితే మరింత అప్ట్రెండ్ కోసం ప్రధాన నిరోధం 47,200 కన్నా పైన నిలదొక్కుకోవాలి. ప్రస్తుత మద్దతు స్థాయి 46,500 వద్ద విఫలమైతే మరింత బలహీనపడుతుంది. ప్రధాన మద్దతు స్థాయి 45,800.
పాటర్న్: మార్కెట్ ప్రస్తుతం స్వల్పకాలిక సపోర్ట్ ట్రెండ్లైన్ కన్నా దిగువన ఉండడం అప్రమత్త సంకేతం. 22,000 వద్ద ‘‘అడ్డంగా ఏర్పడిన సపోర్ట్ ట్రెండ్లైన్’’ వద్ద విఫలమైతే మరింత స్వల్పకాలిక బలహీనతను సూచిస్తుంది. 22,200 వద్ద డబుల్ టాప్ పాటర్న్ ఏర్పడింది. సానుకూలత కోసం దీన్ని బ్రేక్ చేయాలి.
